Déi 4 Lëtzebuerger Elittezaldoten Antoine a Jean NEVEN, Felix PETERS a Jean REIFFERS an der Normandie bleiwend geéiert
Am Juli 2023 hate véier Memberen aus dem Kommitee vun der Unioun vun de Lëtzebuerger Resistenzorganisatiounen A.s.b.l. d’Plage vum Debarquement an der Normandie besicht. Si haten, zesumme mat onse Membere sur place, dem Jean-François PIRET an der Marie-Jeanne MAES, beschloss, bei der Stad Ouistreham ze froe fir eng Plaque commémorative oder eng Stèle souvenir fir ons véier couragéiert Zaldoten aus dem Kommando KIEFFER kënnen opzeriichten. Och déi Hären Albert HANSEN a Guy DOCKENDORF vun der Fonares hunn doropshin an enger Reunioun an der Villa Pauly der Unioun versprach, dëse Projet ze ënnerstëtzen. Den Här PIRET, Präsident vum „Comité de la Pointe du Hoc“ an d’Mme MAES hunn e Rendez-vous beim Maire vun Ouistreham gefrot, fir him de Projet virzedroen an den Accord vu senger Verwaltung ze kréien. De Maire huet de Projet gutt fonnt a versprach, där Saach nozegoen. Et huet sech awer dunn erausgestallt, datt net nëmme Fransousen a Lëtzebuerger an deem Kommando waren, mee Elittezaldote vu weider véier Nationalitéiten. D’Stad Ouistreham huet dunn déi gutt Entscheedung getraff, fir jiddwerengem vun deenen 177 Männer aus dem Kommando KIEFFER e Bam an eng Plaque op der Plage, wou si de 6. Juni 1944 gelant waren, opzeriichten.
D’Realisatioun vum Projet huet sech dunn nach e bësschen erausgezunn. Déi dräi Memberen aus dem Kommitee vun der Unioun, déi vun offizieller Säit op d’Festivitéite fir d’Commemoratioun vum 81. Anniversaire vum D-Day invitéiert gi waren, konnte feststellen, datt der Unioun vun de Lëtzebuerger Resistenzorganisatiounen A.s.b.l. hir Grond-Iddi ëmgesat gi war. Dofir kann een der Gemeng Ouistreham nëmme felicitéieren, datt si doraus en historesch an awer och ekologesch wäertvolle Projet gemaach huet.
